ਵਿਸ਼ਵ ਬਾਜ਼ਾਰ 'ਚ ਕੱਚਾ ਤੇਲ 4.8% ਟੁੱਟ ਕੇ 72 ਡਾਲਰ 'ਤੇ ਪਹੁੰਚਿਆ; ਭਾਰਤ ਵਿੱਚ ਪੈਟਰੋਲ-ਡੀਜ਼ਲ ਦੀਆਂ ਕੀਮਤਾਂ ਅਜੇ ਵੀ ਸਥਿਰ

ਵਿਸ਼ਵ ਪ੍ਰਸਥਿਤੀਆਂ ਅਤੇ ਬਦਲਦੇ ਆਰਥਿਕ ਸਮੀਕਰਨਾਂ ਕਾਰਨ ਕੌਮਾਂਤਰੀ ਬਾਜ਼ਾਰ ਵਿੱਚ ਕੱਚੇ ਤੇਲ (ਕਰੂਡ ਆਇਲ) ਦੀਆਂ ਕੀਮਤਾਂ ਵਿੱਚ ਭਾਰੀ ਮੰਦਵਾੜਾ ਦੇਖਣ ਨੂੰ ਮਿਲਿਆ ਹੈ। ਗਲੋਬਲ ਮਾਰਕੀਟ ਵਿੱਚ ਬ੍ਰੈਂਟ ਕਰੂਡ ਫਿਊਚਰਜ਼ ਦੀ ਕੀਮਤ 4.8 ਫੀਸਦ ਦੀ ਵੱਡੀ ਗਿਰਾਵਟ ਨਾਲ ਹੇਠਾਂ ਡਿੱਗ ਕੇ 72 ਡਾਲਰ ਪ੍ਰਤੀ ਬੈਰਲ ਦੇ ਪੱਧਰ 'ਤੇ ਆ ਗਈ ਹੈ। ਹਾਲਾਂਕਿ, ਕੌਮਾਂਤਰੀ ਪੱਧਰ 'ਤੇ ਆਈ ਇਸ ਵੱਡੀ ਕਮੀ ਦੇ ਬਾਵਜੂਦ ਭਾਰਤੀ ਖ਼ਪਤਕਾਰਾਂ ਨੂੰ ਅਜੇ ਤੱਕ ਕੋਈ ਰਾਹਤ ਨਹੀਂ ਮਿਲੀ ਹੈ। ਦੇਸ਼ ਦੀਆਂ ਸਰਕਾਰੀ ਤੇਲ ਮਾਰਕੀਟਿੰਗ ਕੰਪਨੀਆਂ ਨੇ ਘਰੇਲੂ ਬਾਜ਼ਾਰ ਵਿੱਚ ਪੈਟਰੋਲ ਅਤੇ ਡੀਜ਼ਲ ਦੀਆਂ ਕੀਮਤਾਂ ਨੂੰ ਪਹਿਲਾਂ ਵਾਂਗ ਹੀ ਸਥਿਰ ਰੱਖਿਆ ਹੈ, ਜਿਸ ਕਾਰਨ ਦੇਸ਼ ਭਰ ਵਿੱਚ ਤੇਲ ਦੀਆਂ ਕੀਮਤਾਂ ਵਿੱਚ ਕੋਈ ਬਦਲਾਅ ਨਹੀਂ ਦੇਖਿਆ ਗਿਆ।

ਸ਼ਨੀਵਾਰ ਨੂੰ ਜਾਰੀ ਕੀਤੇ ਗਏ ਸਰਕਾਰੀ ਅੰਕੜਿਆਂ ਮੁਤਾਬਕ ਦੇਸ਼ ਦੇ ਵੱਖ-ਵੱਖ ਮਹਾਨਗਰਾਂ ਅਤੇ ਪ੍ਰਮੁੱਖ ਸ਼ਹਿਰਾਂ ਵਿੱਚ ਈਂਧਨ ਦੀਆਂ ਕੀਮਤਾਂ ਇਸ ਪ੍ਰਕਾਰ ਰਹੀਆਂ:

ਪੈਟਰੋਲ ਦੀਆਂ ਮੌਜੂਦਾ ਕੀਮਤਾਂ (ਪ੍ਰਤੀ ਲੀਟਰ):

ਨਵੀਂ ਦਿੱਲੀ: 102.12 ਰੁਪਏ

ਮੁੰਬਈ: 111.21 ਰੁਪਏ

ਕੋਲਕਾਤਾ: 113.51 ਰੁਪਏ

ਚੇਨਈ: 107.76 ਰੁਪਏ

ਬੰਗਲੁਰੂ: 111.68 ਰੁਪਏ

ਹੈਦਰਾਬਾਦ: 115.69 ਰੁਪਏ

ਜੈਪੁਰ: 113.19 ਰੁਪਏ

ਪਟਨਾ: 113.37 ਰੁਪਏ

ਤਿਰੂਵਨੰਤਪੁਰਮ: 115.49 ਰੁਪਏ

ਗੁਰੂਗ੍ਰਾਮ: 102.97 ਰੁਪਏ

ਨੋਇਡਾ: 101.96 ਰੁਪਏ

ਲਖਨਊ: 101.86 ਰੁਪਏ

ਭੁਵਨੇਸ਼ਵਰ: 108.97 ਰੁਪਏ

ਚੰਡੀਗੜ੍ਹ: 101.54 ਰੁਪਏ

ਡੀਜ਼ਲ ਦੀਆਂ ਮੌਜੂਦਾ ਕੀਮਤਾਂ (ਪ੍ਰਤੀ ਲੀਟਰ):

ਨਵੀਂ ਦਿੱਲੀ: 95.20 ਰੁਪਏ

ਮੁੰਬਈ: 97.83 ਰੁਪਏ

ਕੋਲਕਾਤਾ: 99.82 ਰੁਪਏ

ਚੇਨਈ: 99.55 ਰੁਪਏ

ਬੈਂਗਲੁਰੂ: 99.56 ਰੁਪਏ

ਹੈਦਰਾਬਾਦ: 103.82 ਰੁਪਏ

ਜੈਪੁਰ: 98.25 ਰੁਪਏ

ਪਟਨਾ: 99.36 ਰੁਪਏ

ਤਿਰੂਵਨੰਤਪੁਰਮ: 104.40 ਰੁਪਏ

ਗੁਰੂਗ੍ਰਾਮ: 95.64 ਰੁਪਏ

ਨੋਇਡਾ: 95.44 ਰੁਪਏ

ਲਖਨਊ: 95.36 ਰੁਪਏ

ਭੁਵਨੇਸ਼ਵਰ: 100.68 ਰੁਪਏ

ਚੰਡੀਗੜ੍ਹ: 89.47 ਰੁਪਏ

ਆਰਥਿਕ ਮਾਹਰਾਂ ਮੁਤਾਬਕ, ਇਸ ਤੋਂ ਪਹਿਲਾਂ ਜਦੋਂ ਕੌਮਾਂਤਰੀ ਬਾਜ਼ਾਰ ਵਿੱਚ ਕੱਚਾ ਤੇਲ ਮਹਿੰਗਾ ਹੋਇਆ ਸੀ, ਤਾਂ ਤੇਲ ਕੰਪਨੀਆਂ ਨੇ ਲਗਾਤਾਰ 76 ਦਿਨਾਂ ਤੱਕ ਘਰੇਲੂ ਕੀਮਤਾਂ ਵਿੱਚ ਕੋਈ ਵਾਧਾ ਨਹੀਂ ਕੀਤਾ ਸੀ। ਪਰ ਉਸ ਉਪਰੰਤ, ਕੰਪਨੀਆਂ ਨੇ ਆਪਣੇ ਘਾਟੇ ਦੀ ਪੂਰਤੀ ਲਈ ਪੈਟਰੋਲ ਅਤੇ ਡੀਜ਼ਲ ਦੀਆਂ ਕੀਮਤਾਂ ਵਿੱਚ ਕੁੱਲ 7.60 ਰੁਪਏ ਪ੍ਰਤੀ ਲੀਟਰ ਦਾ ਭਾਰੀ ਵਾਧਾ ਕਰ ਦਿੱਤਾ ਸੀ।

ਹੁਣ ਜਦੋਂ ਕੌਮਾਂਤਰੀ ਪੱਧਰ 'ਤੇ ਕੱਚੇ ਤੇਲ ਦੀਆਂ ਕੀਮਤਾਂ ਮੁੜ ਵੱਡੇ ਪੱਧਰ 'ਤੇ ਹੇਠਾਂ ਡਿੱਗ ਚੁੱਕੀਆਂ ਹਨ, ਤਾਂ ਆਮ ਜਨਤਾ ਅਤੇ ਵਪਾਰਕ ਸੰਗਠਨਾਂ ਵਿੱਚ ਇਹ ਸਵਾਲ ਤੇਜ਼ੀ ਨਾਲ ਉੱਠ ਰਿਹਾ ਹੈ ਕਿ ਸਰਕਾਰ ਅਤੇ ਤੇਲ ਕੰਪਨੀਆਂ ਆਮ ਲੋਕਾਂ ਨੂੰ ਇਸ ਕਟੌਤੀ ਦਾ ਲਾਭ ਕਦੋਂ ਦੇਣਗੀਆਂ। ਬਾਜ਼ਾਰ ਦੇ ਸੂਤਰਾਂ ਦਾ ਮੰਨਣਾ ਹੈ ਕਿ ਜੇਕਰ ਆਉਣ ਵਾਲੇ ਦਿਨਾਂ ਵਿੱਚ ਕੱਚਾ ਤੇਲ 72 ਡਾਲਰ ਦੇ ਆਸ-ਪਾਸ ਜਾਂ ਇਸ ਤੋਂ ਹੇਠਾਂ ਸਥਿਰ ਰਹਿੰਦਾ ਹੈ, ਤਾਂ ਤੇਲ ਕੰਪਨੀਆਂ 'ਤੇ ਦੇਸ਼ ਅੰਦਰ ਕੀਮਤਾਂ ਘਟਾਉਣ ਲਈ ਦਬਾਅ ਵਧੇਗਾ।